ಮೈಸೂರು, ಸೆ.26, 2026: ಕಾನೂನು ವೃತ್ತಿಯಲ್ಲಿ ನೈತಿಕತೆ, ಪ್ರಾಮಾಣಿಕತೆ ಮತ್ತು ಮಾನವೀಯತೆ ಅತ್ಯಂತ ಮುಖ್ಯವಾಗಿದ್ದು, ಕಾನೂನು ಪದವೀಧರರು ಉತ್ತಮ ವಕೀಲರ ಜೊತೆಗೆ ಉತ್ತಮ ಮಾನವರಾಗಬೇಕು ಎಂದು ಸುಪ್ರೀಂ ಕೋರ್ಟ್ ನ್ಯಾಯಮೂರ್ತಿ ಸಂದೀಪ್ ಮೆಹ್ತಾ ಹೇಳಿದರು.
ಕುವೆಂಪುನಗರದ ಜೆಎಸ್ಎಸ್ ಕಾನೂನು ಕಾಲೇಜಿನಲ್ಲಿ ನಡೆದ 18ನೇ ಪದವೀಧರ ದಿನಾಚರಣೆಯಲ್ಲಿ ಮುಖ್ಯ ಭಾಷಣ ಮಾಡಿದ ಅವರು, ವಕೀಲರು ಕಕ್ಷಿದಾರರ ಪರ ವಾದಿಸುವುದರ ಜೊತೆಗೆ ನ್ಯಾಯದ ಆಡಳಿತ ಮತ್ತು ಕಾನೂನಿನ ಆಳ್ವಿಕೆಯ ಜವಾಬ್ದಾರಿಯನ್ನೂ ಹೊಂದಿದ್ದಾರೆ ಎಂದರು. ತಾತ್ಕಾಲಿಕ ವೃತ್ತಿಪರ ಲಾಭಕ್ಕಾಗಿ ಶಾಶ್ವತವಾದ ಪ್ರಾಮಾಣಿಕತೆ ಹಾಗೂ ಗೌರವವನ್ನು ಕಳೆದುಕೊಳ್ಳಬಾರದು ಎಂದು ಸಲಹೆ ನೀಡಿದರು.
ಕರ್ನಾಟಕ ಹೈಕೋರ್ಟ್ ನ್ಯಾಯಮೂರ್ತಿ ದಿನೇಶ್ ಕುಮಾರ್ ಸಿಂಗ್ ಮಾತನಾಡಿ, ಇನ್ನು ಮುಂದೆ ಕಾನೂನು ವಿದ್ಯಾರ್ಥಿಗಳನ್ನು ಪರೀಕ್ಷಿಸುವುದು ಕಾನೂನೇ ಆಗಿರುತ್ತದೆ. ಜ್ಞಾನ, ವ್ಯಕ್ತಿತ್ವ, ಸಂವಹನ ಕೌಶಲ್ಯ, ಪರಿಶ್ರಮ ಮತ್ತು ವೃತ್ತಿಪರ ನೈತಿಕತೆ ಕಾನೂನು ವೃತ್ತಿಯಲ್ಲಿ ಪ್ರಮುಖವಾಗಿವೆ ಎಂದರು. ಎಐ ಮಾಹಿತಿ ನೀಡಬಲ್ಲದು, ಆದರೆ ಮೌಲ್ಯ ಹಾಗೂ ಸಾಮರ್ಥ್ಯವನ್ನು ನೀಡುವುದಿಲ್ಲ ಎಂದು ಅಭಿಪ್ರಾಯಪಟ್ಟರು.
ಈ ಸಂದರ್ಭದಲ್ಲಿ ಎಲ್ಎಲ್ಬಿಯಲ್ಲಿ ಪ್ರಥಮ ರ್ಯಾಂಕ್ ಪಡೆದ ರೋಹನ್ ಗಂಗಡ್ಕರ್ ಸೇರಿದಂತೆ 18 ರ್ಯಾಂಕ್ ವಿಜೇತರಿಗೆ ಬಹುಮಾನ ವಿತರಿಸಲಾಯಿತು. ಒಟ್ಟು 152 ವಿದ್ಯಾರ್ಥಿಗಳಿಗೆ ಪದವಿ ಪ್ರದಾನ ಮಾಡಲಾಯಿತು. ಇದರಲ್ಲಿ ಬಿಎ ಎಲ್ಎಲ್ಬಿ 42, ಬಿಬಿಎ ಎಲ್ಎಲ್ಬಿ 49, ಎಲ್ಎಲ್ಬಿ 44 ಹಾಗೂ ಎಲ್ಎಲ್ಎಂ 17 ವಿದ್ಯಾರ್ಥಿಗಳು ಸೇರಿದ್ದಾರೆ.
ಸುತ್ತೂರು ಮಠದ ಶಿವರಾತ್ರಿ ದೇಶಿಕೇಂದ್ರ ಸ್ವಾಮೀಜಿ ಸಾನ್ನಿಧ್ಯ ವಹಿಸಿದ್ದರು. ಕಾಲೇಜಿನ ಮುಖ್ಯ ಕಾರ್ಯನಿರ್ವಾಹಕ ಪ್ರೊ. ಕೆ.ಎಸ್. ಸುರೇಶ್, ಪ್ರಾಂಶುಪಾಲೆ ಡಾ. ಎನ್. ವಾಣಿಶ್ರೀ, ಪರೀಕ್ಷಾ ನಿಯಂತ್ರಕ ಶಿವಾನಂದ ಭಾರತಿ ಸೇರಿದಂತೆ ಗಣ್ಯರು ಉಪಸ್ಥಿತರಿದ್ದರು.
ಪದವಿ ಸ್ವೀಕರಿಸಿದ ರೋಹನ್ ಗಂಗಡ್ಕರ್ ಕಾಲೇಜಿನ ಶೈಕ್ಷಣಿಕ ಹಾಗೂ ಪೂರಕ ವಾತಾವರಣವನ್ನು ಶ್ಲಾಘಿಸಿದರು.
KEY WORDS:
JSS Law College, Graduation Day, Justice Sandeep Mehta, JSS Law College Mysuru, 18th Graduation Day, Karnataka High Court Justice Dinesh Kumar Singh, Law graduates, Legal ethics, Rule of law, AI and legal education
